يا ترى الشرائح الالكترونية
هتبقى باب السعادة أو دمار البشرية؟
أنت عارف أن في شرائح صغيرة جدًا نقدر نزرعها في أجسام البشر، وتغير طريقة عمل أعضائهم وحواسهم؟ وهل تصدق أن الشرائح دي قادرة على إعادة البصر للمكفوفين، والحركة للمشلولين، والذاكرة لفاقدي الذاكرة؟
هل تتخيل أن الشرائح دي هتقدر تخليك تتكلم لغات جديدة، وتحسب أسرع من الكمبيوتر، وتفتكر كل حاجة بتشوفها أو تسمعها؟
على فكرة ده مش خيال علمي، ولكنه حقيقة علمية. ففي العصر الذهبي للتكنولوجيا اللي عايشين فيه، ظهرت شرائح إلكترونية مدهشة، تقدر تغير حياتنا بشكل جذري، لكن للأسف بالضرورة مش للأفضل. فالشرائح دي ليها مخاطر وعواقب كبيرة، ممكن تهدد حريتنا وخصوصيتنا وإنسانيتنا.
فإيه هي الشرائح دي؟ وبتشتغل إزاي؟ وإيه هي فوائدها وأضرارها؟ ده اللي هنتكلم فيه مع بعض النهارده. فانضموا معانا في رحلة مثيرة لعالم الشرائح الإلكترونية.
إيه هي الشرائح الإلكترونية؟
الشرائح الإلكترونية هي عبارة عن رقاقات صغيرة يتحتوي على ملايين العناصر الإلكترونية المتصلة ببعضها بطريقة معقدة لتشكيل دوائر متكاملة تؤدي وظائف محددة. والشرائح دي بتستخدم في كل أنواع الأجهزة الإلكترونية من الهواتف المحمولة وصولًا للأقمار الصناعية، وعن طريق استخدام الشرائح الإلكترونية دي قدرنا نقلل من حجم وتكلفة واستهلاك الطاقة لكل الأجهزة الإلكترونية.
والحقيقة أن الشرائح الإلكترونية ليها تاريخ طويل من التطور والابتكار، وحققت الشرائح الإلكترونية ثورة في عالم الإلكترونيات، لأنها بتسمح بإنجاز مهام معقدة وسريعة بأجهزة صغيرة وفعالة. لكن الثورة دي موقفتش عند حدود الأجهزة، لكنها امتدت كمان لحدود البشر، فظهرت فكرة الشرائح الإلكترونية اللي بتزرع في أجسام البشر لزيادة قدراتهم أو علاج أمراضهم.
طيب جت منين فكرة استخدام الشرائح الالكترونية في الجسم البشري؟
فكرة استخدام أجهزة تعويضية لاستبدال بعض أجزاء الانسان فكرة قديمة من الازل واشهر أمثلة على ده هو استخدام الانسان من زمان للعصى والعكازات للمساعدة في المشي أو التوازن، واستخدام الأطراف الاصطناعية المصنوعة من الخشب أو العظام أو المعادن لتعويض فقدان الأطراف بسبب الإصابة أو البتر.، واستخدام الأسنان الاصطناعية المصنوعة من العاج أو الذهب أو الخزف لتحسين المظهر أو المضغ.،واستخدام النظارات أو العدسات لتحسين الرؤية أو حماية العين من الضوء أو الغبار.،واستخدام السماعات أو القرون لتحسين السمع أو التواصل مع الآخرين وبتقدم التكنولوجيا كانت بتتقدم طرق استخدامها في مساعده البشر وعلاجهم ومن هنا جت فكرة استخدام الشرائح الالكترونية في معالجة البشر.
ايه بقى فوائد استخدام الشرائح الالكترونية؟
تخيل إنك تقدر تتحكم في كمبيوترك أو موبايلك بفكرك بس، أو ترجع تشوف وتمشي بعد ما كنت ضرير مابتشوفش او مشلول مبتتحركش، وكل ده لما توصل مخك بجهاز شريحة الكترونية، هتقدر تسمع تاني لو مابتسمعش او ترجع أي حاسة من حواسك اللي فقدتها، وبالنسبة للناس العادية، هتقدر تفكر بسرعة كبيرة جدا أسرع من الكمبيوتر ، ويبقى عندك ذاكرة فوتغرافية تحفظ أي حاجة من اول لما تشوفها او تسمعها وتبقى عارفها للابد، لو في جسمك أي مرض او بوادر ظهور مرض بتكتشفها وبتعالجها في الحال، ومش بس كده ده انت كمان لو مش مبسوط او في المود ممكن تغير مودك في لحظة، ايوة لو حاسسس انك حزين هتقدر تغير مودك للسعادة او لو حاسس بالملل تقدر تحس بشعور المغامرة وتدفق الادريالين، وكل ده بأمر من دماغك للشريحة الالكترونية وهيتنفذ بالحال، والكلام ده حقيقه مش خيال، هتبقى قادر على تغيير مزاجك بضغطة زر؟ وده اللي بتسعى ليه الولايات المتحدة الأمريكية دلوقتي من خلال تجربة زراعة شرائح ذكاء اصطناعي في أدمغة البشر . الرقائق دي مشروع عمل العلماء في وكالة مشاريع الأبحاث الدفاعية المتقدمة (DARPA) ، وده فرع من وزارة الدفاع الأمريكية اللي بيطور تقنيات جديدة للجيش. و الشرائح دي هتصدر نبضات كهربائية بتغير كيمياء الدماغ في عملية اسمها العلمي “التحفيز العميق للدماغ” ‘deep brain stimulation.’. وبتهدف العملية دي لعلاج العديد من الأمراض النفسية والحركية، زي مرض باركنسون والاكتئاب المزمن. و صمم العلماء في وكالة داربا للمشاريع البحثية المتقدمة للدفاع خوارزميات ذكاء اصطناعي بتكتشف أنماط النشاط الدماغي المرتبطة بالاضطرابات المزاجية. وبمجرد اكتشافها، يمكن للشرائح إعادة دفع دماغ المريض إلى حالة الصحية تلقائيًا. وتم اختبار التقنية دي بالفعل على ستة أشخاص بيعانوا من الصرع وعندهم أسلاك كهربائية مزروعة في دماغهم لتتبع نوباتهم. وأظهرت التجارب نتائج مبشرة، وتم بشكل كبير تحسين مزاج المرضى وقدراتهم على التعاطف والتركيز. وبيأمل الباحثين أن التقنية دي تبقى متاحة للجمهور في المستقبل القريب.
وزي ماشفنا مع بعض ان على مستوى الحكومات زي حكومة الولايات المتحدة بتقوم بتجارب لاستخدامات الشرائح الالكترونية على البشر، وبالطبع الشركات التكنولوجيا العملاقة وقطاع الخاص الرأسمالي مفوتش الفرصة دي وقالك لازم نستثمر فيها وده طبعا شفناه يوم ما اعلن الملياردير الشهير ايلون ماسك عن مشروع “ نورالينك” اللي هيغير قواعد اللعبة المعروفة للبشر خلال سنوات قليلة.
ايه هو مشروع نورالينك بتاع ايلون ماسك ده ؟
مشروع Neuralink هو مشروع طموح بيسعى لتوصيل الدماغ البشري بالكمبيوتر عن طريق شرائح إلكترونية صغيرة بتزرع في الدماغ. الشرائح دي بتقدر تقرأ وترسل الإشارات العصبية من وإلى الدماغ، وده هيمكن الإنسان من التحكم في الأجهزة والبرامج بمجرد التفكير، و أهم أهداف المشروع ده هي:
– مساعدة الأشخاص المصابين بأمراض أو إصابات في الدماغ، زي الشلل أو العمى أو السكتة الدماغية، على استعادة وظائفهم وتحسين جودة حياتهم .
– تحسين قدرات البشر في التعلم والذاكرة والإبداع والتواصل، وبكده هيقدروا يبقى عندهم مواكبة للتطورات اللي هيحققها الذكاء الاصطناعي والتفاعل معها ومش هيبقى في رفض ولاخوف منه زي ما احنا شايفين وبيحصل قدامنا دلوقتي
– تحقيق “التآزر ” مع الذكاء الاصطناعي ‘Synergy’ with artificial intelligence ، وده مفهوم بيقول إن البشر والآلات يقدروا يتعاونوا بتكامل لخلق نظام أذكى وأفضل بكثير من ان البشر او الذكاء الاصطناعي يتم استخدامهم بطريقة بعيده عن بعض بشكل منفصل.
ونذكر كده سريعا بعض الأمثلة على استخدامات نيورالينك في الفترة المقبلة:
– تشغيل هاتف ذكي أو كمبيوتر أو لعبة فيديو بالتفكير فقط ، هتقدر تتحكم بالكمبيوتر او التليفون وبتعمل كل حاجه فيه من خلال تفكيرك بس
– تحميل معلومات أو مهارات جديدة إلى الدماغ بسرعة وسهولة، يعني تقدر تحمل موسوعات كاملة وتطها في دماغك وتحفظ كل اللغات بسهولة جدا او تتعلم أي مهارة زي فيلم ماتريكس كده لو فاكرين.
– التواصل لاسلكيا مع الآخرين عن طريق نقل الأفكار والمشاعر دون حاجة إلى كلام أو كتابة، يعني حلم البشر في التخاطر ونقل الأفكار بدون كلمات هيبقى سهل ومتاح وده هيبقى ممتاز جدا في حالة استكشاف المحيطات والبحار او حتى في الفضاء واكتشاف الكواكب هيبقى التواصل الانسان بسهولة ومن غير أي أجهزة تواصل وسيطه.
– رؤية أشياء مش موجوده في الواقع، زي الأفلام أو الأحلام أو المشاهد المختلفة، يعني بسهولة جدا تجيب أي فيلم انت بتحبه وتعيشه في الواقع زي اللعبة كده وانت البطل فيه، او انك تحلم بالبنت اللي بتحبها و … ، وبلاش نكمل بقى علشان انت طلعت خلبوص و نيتك مش سليمة.
سؤال هنا بقى، مدام معلش الشرائح الالكترونية دي حلوة كده وهتخلي عيشتنا اخر ورد، ليه خوفتنا من الأول وقولتنا انه مش حلو وتمام وممكن يخلي حياتنا جحيم؟
هقولك انك شاكلك نسيت ان زي ماكل حاجة فيها جانب ايجابي، في كمان جوانب سلبية، هو صحيح الكلام النظري والتطبيق الفعلي للشرائح دي بيقول انه هيعمل ثورة في حياتنا بالفترة الجاية، لكن برضوا ممكن يحقق كوارث أخلاقية واجتماعية قدامنا ومنها على سبيل المثال :
– ايه هي السلامة والفعالية للشرائح دي ؟
احنا لغاية دلوقتي مش عارفين ايه هي المخاطر والآثار الجانبية المحتملة لزرع شريحة في المخ ، المخ عضوا حساسا جدا وهو الكمبيوتر اللي بيتحكم في الجسم، ولو تم اصابته بعطب الانسان هيتحول لكتلة بيولوجيه من البلاهه ملهاش أي قيمة او لازمه ومجرد جسد عضوي واخد حيز من الطبيعة والحياة بدون أي فاعلية تذكر.
– ثاني حاجة ازاي الجهاز يتنظم ويتراقب؟
دلوقتي الجهاز ده هيتنظم ازاي ومين اللي هيبقى ليه رقابه عليه، الشركات اللي صنعته ولا الحكومة بتاعت الدولة للي عايش فيها الفرد، لازم حاجة مهمه زي كده تكون واضحه وباينه من الأول.
ازاي الجهاز يتشال أو يتحدث لو لزم؟
افرض الشخص لاي سبب ما حب يتخلص من الشريحه دي، هيقدر بسهولة يشيلها وبطريقة غير مكلفة وغير خطرة، ولا هيبقى صعب وفي نسبه كبيرة من المخاطر على حياته.
– الخصوصية والأمان؟
ازاي هيبقى حياة الشخص المزروع فيه الشريحه دي حياته محمية وفيها خصوصية، مش هيحصله مثلا زي ماحصل في شركة تسلا بتاعت ايلون ماسك برضو لما عربيات تسلا كانت بتصور أصحاب العربيات بدون علمهم وتبعت الفيدوهات دي للشركة والموظفين كانوا بيضحكوا مع بعض وفضلوا يتناقلوا الفيدوهات دي لحد ماوصلت للناس والصحافة وبقت فضيحة كبيرة، ايه اللي يضمن ان حياتك متبقاش مشاع للموظفين في الشركة دي فش المستقبل وممكن تبقى تحت رحمتهم وابتزازتهم كمان.
واسأله كثير زي قد ايه البيانات اللي بتتبعت من واجهة نورالينك محمية؟
ومين صاحب ومسيطر على البيانات دي؟
ازاي الجهاز يتحمى من التخريب أو التلاعب؟
ازاي الجهاز هيأثر على أفكار المستخدم، مشاعره وسلوكه؟
ازاي الجهاز هيتفاعل مع شخصية المستخدم، قيمه ومعتقداته؟
يعني متلاقيش نفسك بعض كده فجأة بقيت تتعاطف مع قتلة محتلين لدولة معادية محتلة لمجرد انها تقدر تزرع تكنولوجيا في الشريحه دي بكل سهولة في المستقبل تخليك تتعاطف معاهم، او انك تلاقي نفسك بقيت متعاطف مع الخوا جااااااااااات وبقيت بتدعم الريمبو فجأة، وغيرها كثير وكثير من التساؤلات والمصائب اللي ممكن تحصل قريب بسب الشرائح دي.
والسؤال هنا مطروح ليك، انت شفت قد ايه الفوائد الخاصة بزرع الشرائح الالكترونية، وقد ايه المصائب اللي ممكن تحصل بسببها، هل شايف انك ممكن تستخدمها بعد كده في المستقبل في مقابل انها تخلي حياتك افضل ولا هتخاف وتقول لا ياعم انا خليني في الجسم الطبيعي اللي ربنا خلقني بيه احسن، بس خلي بالك ان ممكن من شروط الوظائف في المستقبل ان الموظف يبقى عنده شريحه زي دي في مخه علشان يتعين، وساعتها هيتم نبذ الانسان الطبيعي وهيبقى موجود زي عدمه تقريبا، مش قولتلك الموضوع ده هيأثر على حياتنا كلنا في المستقبل، ولو حابين نتكلم عن الموضوع ده وازاي هيبقى شكل حياتنا في المستقبل بعد استخدام الشرائح دي، اكتبولي في التعليقات.
وفي النهاية، متنساش تسيب لايك على البوست لو عجبك، وتعمل شير وفولو علشان يوصلك كل المحتوى اللي جاي، وميفوتكش أي جديد..
***
مصادر: