(عملية القفز العالي)

العملية السرية الاغرب في التاريخ

____________________

Intro:

Operation Highjump 

تخيل كده وجود مدينة مخفية تحت الأرض بعيد عن عيون السكان العنيفين والبدائين اللي عايشين فوق الأرض اللي هو احنا !!

هيكون شكلها عامل ازاي ؟

مجتمع متقدم مسالم، ممستهوش حروب او كوارث طبيعية، وعنده ثقافة مزدهرة وساكن في اراضي واسعه وشاسعه تحت الأرض، ومش بس كده دي كمان في أبرد مكان في  العالم، القطب الجنوبي

النهارده هنتكلم عن  Operation High jumpاو عملية القفز العالي واللي كانت عبارة عن عملية استكشافية روتينة زي ماقالت الولايات المتحدة الامريكية ساعتها، ولكن بسبب العملية الروتينة دي تم تشكيل أكبر رحلة بحرية عسكرية في التاريخ في الوقت ده!

ياترى العملية دي اللي كان فيها آلاف الجنود والقوات، لقت ايه هناك في القطب الجنوبي، والقائد بتاعهم شاف ايه هناك خلاه يحذر أمريكا  والعالم بسببه، ده اللي هنتكلم عنه النهارده..

فسيب كل اللي في ايدك وركز معايا ويلا بينا ..

Script:

في أغسطس سنة 1946 أرسلت الولايات المتحدة الأميركية أكبر بعثة بحرية عسكرية في التاريخ، لاستكشاف للقطب الجنوبي، وكان رئيس البعثة دي الأدميرال ”     ريتشارد بايد –richard byrd ” أحد أشهر الظباط البحرية في التاريخ الأمريكي..

وتم الإعلان الرسمي للبعثة دي، بأنها هتكون بهدف التدريب والتمرين للقوات دي في القطب الشمالي ودراسة الطقس هناك ولكن بالفعل البعثة دي كان ليها هدف تاني خالص، وهيؤدي لنتائج مرعبة ومذهلة في نفس الوقت.

الأهداف الغير معلنه عن البعثة دي، كانت أولا بسط سيادة أمريكا على قارة أنتاركتيكا والثاني هو السيطرة على قاعده عسكرية نازية ألمانية هناك، والحصول على سلاحها السري اللي كان عباره عن ” طبق طاير ” !!

وبدل مايكتشف الامريكان هناك الأطباق الطايرة اكتشفوا حاجه أخطر وأغرب بكثير ..

وعلشان نفهم القصة كاملة لازم نفهم شوية معلومات بسيطة عن اللي حصل في الفترة دي..

كلنا عارفين ان الفوهلر هاتلر كان عنده ولع شديد في جمع الاثار القديمة، اللي كان بيعتقد ان عندها قدرات خارقة وغامضة، ممكن تساعده في امتداد نفوذه وسيطرته الكاملة على العالم كله، وعلشان كده ، شكل  مخصوص مجموعة من العلماء والمهندسين اسمهم

”  مجتمع ثول او thule society”

وكانت مهمه انجماعه “ثول” دول انهم يبحثوا عن الأمور الغامضة والغريبة اللي ممكن يستفاد بيها النازيون في علومهم وحروبهم، وكان مجتمع ثول دول عندهم اعتقاد بوجود جنس بشري او اشبه بالبشري وبيتمتع بقدرات علمية وتكنولو جية كبيره جدا، عايش تحت الأرض ..

والمدخل للأرض دي موجود في قارة أنتاركتيكا وأطلق جماعه ثول على الجنس ده اسم ” Aryans “..

و كان هدفهم انهم يحاولوا انهم يتفاوضوا مع “الاريانز” على انهم يساعدوا النازيين ببعض القدرات العلمية والتكنولوجية اللي عندهم، وبالفعل أطلق هتلر بعثة علمية بقيادة جماعه “ثول” دول في 17 ديسمبر سنة 1938..

من خلال سفينة ” SS Schwabenland” واتجهوا برحلة للقطب الجنوبي !!

وخلال 3 أسابيع بس قدروا الالمان انهم يرسموا خرائط لأميال ضخمة من القطب الجنوبي، واستقروا في هناك وحطوا الغواصات بتاعتهم، وبنوا قاعده عسكرية تحت الأرض هناك واطلقوا عليها اسم القاعدة ” 211 “..

والقاعدة دي كانت كبيرة وضخمة لدرجة انه اشبه بالمدينة تحت الأرض وكانت مجهزه كمكان هجومي لأطلاق الصواريخ وغيرها من القطع الحربية..

ومع بداية الهزيمة للنازيين في الحرب العالمية الثانية، توقع الامريكان ان نازيين كثير خدوا أسلحتهم واسرارهم وعلومهم واتجهوا انهم يستخبوا هناك في القاعدة 211 ومن هنا جت فكرة ان أمريكا ترسل البعثة العسكرية الضخمة دي للقطب الجنوبي، علشان يلاقوا النازيين ويستولوا على أحدث سلاح عملوه وهو الأطباق الطائرة النازية، لان تم مشاهدة اطباق طائرة بأعداد ضخمة جدا بتخرج من جهة القطب الجنوبي وبترجع هناك تاني..

ومن هنا فكر الامريكان سنين عديده انهم يسيطروا على اسرار النازيين لحد ما قرروا يبعتوا البعثة دي اللي كانت بأسم ” Operation Highjump” وبالفعل انطلقت سنة 1946 زي ماقولنا وقالوا انهم هيقعدوا هناك لمده أربع شهور كاملين..

واتحركت البعثة المكونة من 13 سفينة و  23 طياره واكثر من 4700 عسكري ..ووصلت القطب الجنوبي وبدئوا في يوم 15  يناير انهم يبنوا قاعده عسكرية هناك اطلقوا عليها اسم ” أمريكا الصغيرة – little America” ..

ولكن حصل حاجه غريبة جدا للقاعدة دي خلت البعثة اللي كانت هتقعد هناك اربع شهور، ويقرروا انهم ينسحبوا من القاره الجنوبية، بعد 40 يوم بس !!

وتم الإعلان عن فقد عدد من الطيارات ودمارها هناك، وموت عدد من الجنود، ورجع الادميرال ريتشارد بايد مع البعثة وكان باين عليه الفزع، وفي طريق عودته استقرت البعثة في دولة تشيلي، وبعد انتشار الاشاعات عن ام في اكتشاف مخيف اجبر البعثه على العودة، تجمع الصحفيين وسألوا ريتشارد بايد عن سبب عودته السريعة دي وهل كان في سبب لكده؟

علشان يرد ويقول الادميرال ريتشارد بايد ، أقواله صادمه جدًا وبدل ماينفي الاشاعات اللي وصلت لهم ، اكدها اكثر لما قال :

” أعرب عن قلقي بسبب وجود احتمالات حقيقية لشن هجمات جوية مدمره على الولايات المتحدة الامريكية وعلى كل بلاد العالم، وقال ان على أمريكا انها تتخذ إجراءات دفاعية فورية ضد القوات المعادية الموجودة في القطب الشمالي والجنوبي ”

وكلامه ده أشعل بلبله في الصحف العالمية لمده اسبوعين، خلت الولايات المتحدة تتنظر رجوعه على أحر من الجمر، وبالفعل بعد مارجع هو وبعثته، تم مناقشته من قبل القادة بتوعه على الفور، والغريب انه  بعد لقاءه معاهم مصرحش بأي تصريح تاني أبدا عن البعثة بتاعته دي نهائيا لحد ما مات !!

واعتبرت القصة دي واي حاجه يتعلق فيها ملف سري للغاية غير مسموح لأي حد الاطلاع عليها، والا هيتقبض عليه في الحال!!

والبحرية الامريكية أعلنت عن ملخص سريع عن البعثة هناك وقالت انه تم التدريب وخلافه، وتم سقوط بعض الضحايا بس مجابوش سيرتهم ماتوا ازاي وليه، ولكن قالوا انهم اتدفنوا هناك حتى مجبوش أجسادهم معاهم ..

وتم ذكر في سجلات البعثة الرسمية ان طياره الادميرال ريتشارد بايد، اختفت لمده 3 ساعات كامله، وقالوا ان الوقت اللي اختفت فيه الطيارة دي بسبب سوء الأحوال الجوية وانقطاع الراديو، ولكن هل هو ده اللي حصل فعلا ؟!

الإجابة لأ..

 لأن الاسرار اللي كان ممنوع يقولها الادميرال ريتشارد بايد عن البعثة دي لأنتاركتيكا، فضلت سريه لحد ما مات، ولكن بعد ما مات لقى ابنه مذكرة والده السرية  اللي كان كاتب فيها الاحداث الحقيقية اللي شافها هناك، وطلب من ابنه ينشرها، وبالفعل نشرها ابنه على رغبته، ومن هنا كانت الصدمة اللي حدثت للعالم ساعتها !!

واللي أتذكر في مذكرات ريتشارد بايد   واللي كتبها بأيده انه كان بيحضر في يوم لرحلته الاستكشافية بالطيارة المخصصة له، وكان الجو صافي والشمس طالعه، وكل الأمور تمام وبالفعل اتحرك بالطيارة الساعة 8 وربع، وهو بيتفقد الأرض تحتيه اكتشف لون غريب كده في الثلج فجذب نظره، واتحرك ناحيته وقعد يلف حواليه بالطيارة علشان يحدد ايه اللي في الثلج ده بالظبط ..

وفجأة لقى البوصلة اللي بيستخدمها علشان يحدد الطريق بقت تتحرك بطريقة سريعة جدا، خلت انه من المتسحيل يعتمد عليها، ولكنه استخدم الشمس كمصدر للملاحة ومعرفه الطريق بدل منها، وحس ان حركة الطيارة ابتدت تقل، فستغرب ايه اللي سبب كده..

ولكنه لمح من بعيد سلسلة جبال ، فتوجه بطيارته ليها علشان تبدأ رحلته الغريبة دي

فضل طاير فوق سلسلة الجبال الغريبة دي ليكتشف انه بقى جوه وادي تحت الأرض!!

والغريب انه شايف الأرض بوضوح بسبب الضوء، ولكنه مش شايف الشمس، ودي كانت مشكلة كبيرة بالنسبة له علشان كان بيعتمد عليها في قيادته للطيارة، وفجأة شده انتباهه ملاحظه مذهلة، الوادي اللي حواليه ده لونه أخضر !

تخيل وسط القارة القطبية الابرد في العالم تلاقي وادي بلون أخضر، ومش بس كده، ده كمان لقى غابات وأشجار وزرع وانهار، وكمان لقى حيوانات ضخمة وشكلها غريب، قرب ريتشارد اكثر علشان يشوف الحيوان ده بطريقة أوضح، ليكتشف انه حيوان الماموث، اللي مفروض انه انقرض من آلاف السنين!!

حاول يبلغ ريتشارد كل اللي شافه باللاسلكي ولكنه ملقاش أي استجابه، وفجأة شاف على مرمى بصره اغرب حاجه ممكن يتخيلها ؟!

مدينه كامله ملونه بالوان قوس قزح ومكونه من مواد شفافة قال انها ممكن تكون كريستال، تخيل انه شاف مدينة مذهلة كريستالية تحت الأرض، تفتكر ممكن يكون أحساسه كان ايه ؟

صدمته كانت كبيره لما شاف المكان ده، واللي زود اندهاشه اكثر انه لاحظ ان درجة الحرارة بقت اقل بكثير  ومفيش ثلج، فقام بحساب درجة الحرارة واكتشف انها 74 درجة فهرنهايت يعني حوالي ” 23″ درجة مئوية !!

فجأة شاف الأدميرال ريتشارد بايد اجسام طائرة بتحرك بسرعة من يمينه وشماله وبتقرب من اجنحته، فشعر بالخوف الشديد، وحاول يبعد عنهم ويناورهم ولكنه لقى الطيارات الغريبة اللي قال انها كانت على شكل أقراص كبيرة وبتطلع أضواء وملهاش صوت قربت منه ناحية الجناحين، ومنعته من الحركة نهائي..

وهنا كانت مفاجأة جديدة للأدميرال لما لقى اللاسلكي بتاعه اللي فضل ساعه تقريبا مش شغال، صدر منه ضوضاء فجأة واصوات لشخص بيتكلم بالإنجليزية ولكن بلكنه المانية

وبيقوله :

“ أهلاً وسهلاً يا أدميرال بينا، انت هتهبط على الارض في غضون سبع دقائق، استرخِ يا أدميرال، فأنت في أيدٍ أمينة”

وهنا قال الادميرال انه لأحظ أن محركات طيارتهم وقفت عن الدوران، و طيارتهم  بقت تحت سيطرة الأقراص الضخمة دي وبيحركوها بشكل عجيب.

 وبعد 7 دقائق بالظبط كان الادميرال على الأرض ولقوا في انتظارهم رجال بيض طوال وبشعر أصفر، كانوا بيبتسموا ليهم وقالولهم تعالوا ورانا .

وبعدين خدوهم لحاجه زي الاسانسير وراحوا مكان تاني، ولاحظ ان المحركات بتشتغل بسرعه كبيره جدا وبنفس الوقت ملهاش صوت نهائيًا.

تم دخولهم جوه المدينة اللي كان واضح جدا انها متقدمة تكنولوجيًا بمراحل عن التكنولوجيا الأرضية بتاعتنا، وقالولهم الرجال انهم هيقابلوا السيد ” the master“

واخدوا الادميرال ريتشارد بايد ودخلوه اوضه كان فيها راجل عجوز وقالوله ان هو ده السيد او الماستر ، وقعدوا على طاولة كبيرة جدا وعرف السيد نفسه وقال انهم من جنس متقدمة اسمه الارياني  – Aryans”

ودار مابين ريتشارد بايد والسيد حوار طويل جدا، مختصره ان “الاريانين ” كانوا بيراقبوا البشر

من فترة طويلة جدًا، وانهم قرروا انهم يتدخلوا دلوقتي ويعلنوا عن نفسهم علشان الاستخدام الذري اللي عملوه البشر وتدميرهم لهيروشيما ونجزاجي، وقاله ان البشر هيدمروا نفسهم بالاستخدام الذري ده، وان البشر لسه مش ناضجين لاستخدام الذره

واشتكي السيد من انه كل ما كانوا يحاولوا يقربوا من البشر بطيارتهم علشان يتواصلوا معاهم، يلاقوا البشر هاجموهم واطلقوا عليهم النيران بسرعه ويطاردوهم ، وعلشان كده قرروا انهم يتواصلوا مع الادميرال ريتشارد بايد علشان يوصل رسالتهم للبشر، لأنه شخصية مشهوره ومحترمه، والبشر هيصدقوه..

وفي نهاية اللقاء ودعه السيد وطلب منه الناس الطوال اللي جابوه انه يمشي وراهم من جديد، وكان بيقول الادميرال ساعتها كنت حاسس أنى في حلم، ولكن كل اللي حواليه انا ورجالتي بيقول انه حقيقة، واصطحبوه تاني لطيارته وسحبوهم هو ورجالته لحد المدخل اللي جم منه، وسمع صوت في الراديو بيقول ان التحكم في طيارتهم اصبح متاح تاني

واتحرك الادميرال هو ورجالته وهما مش مصدقين اللي شافوه ورجعوا تاني للقاعدة بتاعتهم وبعديها قرروا انهم  يرجعوا لأمريكا.

وهناك في البنتاجون تم استجواب الادميرال ريتشارد بايد، وقالوله بناء على اوامرنا واوامر الرئيس ممنوع تتكلم عن أي حاجه حصلت او تقول عليها، وهنا قال الادميرال في مذكراته انه كان مصدوم انه مش هيبلغ الرسالة للعالم زي مطلب منه السيد، ولكنه قال انه راجل عسكري في النهاية ووافق على كده، ولكنه ساب الحقيقة في مذكراته السرية اللي سابها لابنه قبل مايموت..

وبعد ما شفنا مع بعض القصة المذهلة اللي شفناها دي، تعالوا نسأل نفسنا بصوت عالي هي القصة دي حقيقية..

الاجابه اه حقيقية، فعلا المهمة دي بقيادة الادميرال ريتشارد راحت للقطب الجنوبي وحصلت التفاصيل دي كلها، ولكن اعتراض الحكومة ان محصلش مقابلة لأي كائن من الأرض المجوفة او اصلا في أرض مجوفه، واتكلموا عن القصة دي دخيلة على قصة عملية القفز العالي الحقيقية..

ومن الأمثلة على فبركة القصة دي إن أجزاء كثير من حديث الماستر مع الادميرال.. كان متاخد من فيلم اسمه lost horizon اتعمل سنة 1937 ،لما كان الممثل الرئيسي بيتكلم مع الدلاي لاما في الفيلم..

كمان في كاتب مشهور بالكتابة عن الأطباق الطائرة والأرض المجوفة اسمه “ريموند براند- “raymond bernard ، وهو اللي كاتب المقدمة بتاعت مذكرات الادميرال وممكن يكون زيف كثير منها علشان يثبت صحة نظرياته بطريقة أكبر مصداقية..

طيب وبالنسبة للسفينة النازية  ” SS Schwabenland” اللي راحت للقطب الجنوبي علشان تبني قاعده هناك..

بيقال انها سفينة راحت علشان تجمع زيوت الحيتان بكمية كبيره، علشان يبقى عند النازيين قدرات غذائية ضخمه تساعدهم في الحرب اللي كانت بتستعد ليها في الوقت ده.

طيب وبالنسبة للقاعدة 211  اللي بناها النازيين، فمحدش لقى أي آثار ليها؟

طيب وصحيفة ” إل ميركوريو –” el mercurio  التشيلية اللي نشرت تصريحات الادميرال؟

بيقال انها حرفت اقول الادميرال وحطت عليها الشطة الصحفية بتاعتها زي ماكان بيعمل محمد سلام في الكبير قبل كده.

طيب ولو اجزمنا بأن القصة دي مش حقيقية فعلا ومحصلتش..

 هنتفاجئ بحاجات غريبة جدا صعب انها تبقى صدفة..

زي إن مثلا  بعد 18 شهر من عملية القفز العالي؛ تم كتابة اتفاقية تمنع اي حد يروح القاره القطبية الجنوبية من غير اذن خاص من  ال12 دوله الموقعين على الاتفاقية..

 وحتى لو خدت تصريح هتروح بس لأماكن معينه في القاره ومتقدرش تروح أماكن غيرها ، وعلى فكره القطب الجنوبي أكبر من قارة أوروبا كلها.. وأستراليا دي حتى أكبر من مساحة امريكا نفسها..

كمان طياره الادميرال اللي اختفت 3 ساعات في سجلات رسمية، ورجعت تاني، ازاي فضلت 3 ساعات في الجو من غير أي وقود؟

وبالنسبة للكاتب ريموند براند اللي قالوا انه هو اللي كتب مقدمة الكتاب وزيف الاحداث فيه، فهل ياترى ابن الادميرال هيسمح ان حد يعدل في مذكرات ابوه، ويزور فيها ويشوه تاريخه العسكري الكبير اللي عمله، أظن معتقدش انه يسمح بكده..

وانت ايه رأيك، هل هناك قاعده نازية فعلا وهل في حضارة تحت الارض بالفعل في القطب الجنوبي، وهل بالفعل الحكومة الأمريكية خبت المعلومات دي علينا؟

ولا ان القصة دي مفبركة وان امريكا بعثت البعثة دي علشان تدرب عساكرها، وتعمل دراسات على الطقس زي ما بتقول؟

حابب أسمع اجابتك..

وفي النهاية، متنساش تسيب لايك على الفيديو لو عجبك، وتعمل سبسكرايب وتفعل زرار الجرس عشان يوصلك كل المحتوى اللي جاي، وميفوتكش أي جديد..

تقدر تشوف مقال وفيديو جديد من هنا

فيديو اليوتيوب

***

مصادر:

https://ohiostatepress.org/books/BookPages/GoerlerTo.htm

https://cgaviationhistory.org/1946-operation-high-jump

https://www.smithsonianmag.com/air-space-magazine/operation-highjump-18223476

https://medium.com/the-weird-closet/the-strange-hollow-earth-case-of-admiral-richard-byrd-7469a62264fc

https://documents.theblackvault.com/documents/technology/highjump/AntarcticFOIA.pdf

https://www.independent.co.uk/news/world/europe/secret-nazi-military-base-russian-scientists-alexandra-land-a7373401.html

يرجى ترك هذا الحقل فارغا

ابق على اطلاع

هل تحب الروايات المثيرة والمقالات المفيدة؟
اشترك الآن ليصلك كل جديد من الكاتب إسلام عبد الله مباشرة في بريدك.

نحن لا نرسل البريد العشوائي! اقرأ سياسة الخصوصية الخاصة بنا لمزيد من المعلومات.

✅ شكرًا لانضمامك! تحقق من بريدك لتأكيد الاشتراك، ولا تنسَ مراجعة مجلد الرسائل غير المرغوب فيها أيضًا.