(2030 هي سنة الخلود للبشر)
____________________
Intro:
الحياة الأبدية، الشباب الدائم ، عدم الموت، كلها مصطلحات بتمر على ودانا من حين لأخر، وبنقعد نفكر فيها فيها لفترة من الوقت، ياترى انا لو عندي حياة ابدية هعمل ايه وهعيش أزاي، ولكن بنصحى على الواقع الأليم على طول ونفتكر ان الحياة مش ابدية واننا منقدرش لغاية دلوقتي اننا نهرب من الموت، طيب انا ليه انا قولت منقدرش نهرب من الموت دلوقتي، مقلتش في المستقبل؟!
لأن ممكن جدا في المستقبل اننا نتغلب على الموت ويبقى لينا حياة ابدية، وكلمة المستقبل هنا مش معناها المستقبل البعيد اللي هو 100 او 200 سنة ولكن المستقبل هنا كام سنة، بالظبط 7 او 8 سنين من دلوقتي ، يعني هيبقى عندنا بشر خالدين من اول سنة 2030، طيب ايه حكاية الخلود دي، وهتحصل أزاي خلال 8 سنين ده اللي هنعرفه مع بعض دلوقتي فركز معايا ويلا بينا؟
Script:
فكرة الخلود شائعة جدا من زمان، كنا بنقراها دايما في الكتب والروايات وبنشوفها في الأفلام والمسلسلات، ونفكر فيها دايما في حاجة افضل من كل ده كمان، في خيالنا، مين فينا مفكرش قبل كده انه يبقى عنده حياة ابدية، وميبقاش في موت، مين فينا مايحبش يبقى عايش مع اللي بيحبه للأبد من غير مايخطفه الموت منه؟
عدد قليل جدا اللي ممكن يبقى معندوش رغبة الحياة الأبدية لان الخوف من الموت والاندثار ده شيء فطري مولودين بيه وموجود في جيناتنا من زمان، علشان كده كنا بنحاول ننتصر على فكرة الموت اللي بيلاحقنا دي بالقصص والروايات او الأفلام والمسلسلات او حتى في خيالنا، وزي الرغبة دي كانت عندك طبعا كانت عند معظم الناس اللي منهم العلماء والأطباء والمخترعين، اللي بدورهم عايزين يقضوا على الموت هما كمان ويغلبوه ويتمتعوا بالحياة الأبدية، واحنا سمعنا عن ابتكارات واخترعات كثير عن موضوع التغلب على الموت والخلود، أبحاث واافكارر كثير تم طرحها ولكن لغاية دلوقتي مشفناش حاجة حصلت فعليا، ولكن كل ده أتغير في موضوعنا النهاردة، لان النهارده في أبحاث بتقول اننا هنقضي على الموت قريب ومش بس قريب ده كمان بقي في تاريخ محدد للخلود كمان وهو سنة 2030، طيب هو أي حد يقولنا حاجة نصدقها ولا ايه، ايه اللي يخلينا اننا نتاكد ان موضوع الخلود اللي سنة 2030 ده هيبقى حقيقي ومش مجرد فنكوش زي كل المواضيع اللي سمعنا عنها وقراناها قبل كده، هقولك مصداقية الموضوع هنا قايمه على مصدقية الشخص اللي طرح الموضوع ده وهو العالم ” راي كورزويل – Ray Kurzweil” والعالم ده شخصية غريبة وعجيبة عنده قدرة علمية تنبؤية رهيبة جدا، تخيل انه تنبأ بحدوث أشياء علمية كانت درب من المستحيل وحصلت بعد كده بالظبط في المستقبل، مش بنسبة بسيطة، العالم راي كورزويل ده تنبأ ب 147 تنبأ وكان تنبأه ده صحيح بنسبة 86% !
تخيل النسبة 86% دي نسبة محصلتش قبل كده، ده ولا كأنه كمبيوتر كمي ماشي على الأرض، وعلشان نفهم أهمية اللي قاله الراجل ده لازم نتعرف عليه الأول .
هو مين الشخص اللي اسمه راي كورزويل ده؟
Ray Kurzweil هو عالم حاسوب ومخترع أمريكي اتولد في 12 فبراير 1948 في كوينز، نيويورك . نشأ في أسرة يهودية علمانية وأظهر موهبة استثنائية في العلوم والتكنولوجيا من وهو صغير، و في سن 15 سنة، اخترع برنامج لتحليل الموسيقى الكلاسيكية وفاز بجائزة من معهد ويستنغهاوس للعلوم . وفي سن 17 سنة، اخترع جهاز للتعرف على الصوت البشري وظهر في برنامج إيف سارجنت .
درس كورزويل في معهد ماساتشوستس للتكنولوجيا (MIT) واتخرج منه بدرجة البكالوريوس في علم الحاسوب والأدب في سنة 1970 . وبعد التخرج، أسس شركة كورزويل كمبيوتر برودكتس،. ومن هنا قام بتطوير أول نظام للتعرف على الحروف الضوئية للخطوط المتعددة . وفي سنة 1978، باع شركته لشركة إكسروكس ومسك منصب مدير قسم التعرف على الحروف الضوئية فيها .
وفي الثمانينات والتسعينات، اخترع كورزويل العديد من الأجهزة والبرامج اللي بتستخدم تقنية التوليف الصوتي والتعليم المتعدد الوسائط والذكاء الاصطناعي . ده غير كمان انه بقى مستشارا للعديد من المؤسسات والشخصيات البارزة، زي المغنية ستيفي وندر والرئيس بيل كلينتون والجيش الأمريكي .
وفي سنة 1999، نشر كورزويل كتابه الأول “The Age of Spiritual Machines”، واللي تنبأ فيه بأن الذكاء الاصطناعي هيتفوق على الذكاء البشري بحلول عام 2045، وأن الإنسان هيبقى قادر على دمج نفسه مع التكنولوجيا والحصول على قدرات خارقة . والفكره دي اسمها “السينغولارية التكنولوجية او التفرد التكنولوجي”، والفكرة دي بقت محور اهتمام كورزويل في كتبه ومحاضراته بعد كده.
وفي سنة 2012، انضم كورزويل لشركة جوجل كمدير للهندسة، ومهمته كانت انه يطور مشاريع بتستخدم تقنية التعلم الآلي والذكاء الاصطناعي، وطبعا احنا شفنا الذكاء الاصطناعي وصل لحد فين بعيننا الأيام اللي فاتت دي.
طيب ايه مثلا اللي تنبأ بيه كوروزيل ده واتحقق بالفعل في التقدم التكنولوجي؟
هقولك ياسيدي في سنة 1990، توقع أن يخسر أفضل لاعب شطرنج في العالم أمام الكمبيوتر بحلول عام 2000 ، وبالفعل ده حصل في سنة 1997 لما كسب ديب بلو على جاري كاسباروف وكانت صدمة كبيرة للعالم ساعتها.
وقدم كورزويل تنبؤً مذهل تاني في سنة 1999، لما قال إنه بحلول عام 2023 هيكون في كمبيوترات محمولة بقيمة 1000 دولار قوة الحوسبة فيها تقريبا بقوة عقل بشري وقادره على تخزين البيانات بكميات رهيبة، وطبعا احننا شفنا ده بعيونا دلوقتي، كمبيوترات خارقه وباحجام تخزين رهيبة وبسعر معقول، وفي تنبؤات كثيرة جدا قالها العالم كورزيل زي ماقولنا هو عمل 147 تنبؤ و 86% منهم اتحققوا بالفعل، ولو عايزين نتكلم في حلقة مخصوص عن تنبؤاته دي بالتفصيل اكتبوا ده في التعليقات.
ونقول بسرعة كده مع بعض اخترعات راي كورزيل :
– نظام التعرف على الحروف الضوئية المتعدد الخطوط: وده برنامج كمبيوتر قادر على التعرف على النص المكتوب بأي خط طبيعي. وقبل الاختراع ده كانت الماسحات الضوئية بتقدر بس انها تقرأ النص المكتوب لعدد خطوط قليلة جدا.
– قارئ كورزويل: وده جهاز بيستخدم للتعرف على الحروف الضوئية لقراءة النصوص المطبوعة بصوت عالي للمكفوفين وضعاف البصر.
– كورزويل 250 : وده أول جهاز مولد للصوت بيستخدم تقنية التوليف الرقمي لإنشاء أصوات آلات موسيقية واقعية.
– كورزويل 1000: وده أول ماسح ضوئي مسطح بيستخدم للتعرف على الحروف الضوئية لتحويل النصوص المطبوعة لملفات رقمية قابلة للتعديل.
– سايبر إد: وده برنامج تعليمي بيستخدم تقنية التفاعل المتعدد الوسائط لتعليم الأطفال مهارات القراءة والكتابة والحساب.
– كورزويل 3000: وده برنامج بيستخدم التعرف على الحروف الضوئية والتوليف الصوتي والإملاء والقاموس لمساعدة طلاب صعوبات التعلم على تحسين قدراتهم في القراءة والكتابة والدراسة.
– كورزويل 4000: وده أول جهاز بيستخدم تقنية التوليف المادي لإنشاء أصوات آلات موسيقية حقيقية من خلال تحليل خصائصها الفيزيائية.
– كورزويل 5000: وده أول جهاز بيستخدم تقنية التوليف المادي لإنشاء أصوات بشرية حقيقية من خلال تحليل خصائصها الفيزيائية والإنشائية.
– كورزويل BCI: وده جهاز بيستخدم تقنية التفاعل بين المخ والكمبيوتر لتحسين قدرات الإنسان في التذكير والتفكير
– كورزويل AI: وده برنامج بيستخدم تقنية الذكاء الاصطناعي لتحليل البيانات والنصوص والصور والأصوات وإنشاء محتوى جديد ومفيد.
– كورزويل نانو: وده جهاز بيستخدم تقنية النانو تكنولوجي لإنشاء أجهزة صغيرة جدا تقدر تتفاعل مع الخلايا والجزيئات والذرات.
– كورزويل سينغولاريتي: وده مشروع بيهدف لتحقيق التفرد التكنولوجي، والتفرد التكنولوجي ده بيتقال على اللحظة اللي هيتفوق فيها الذكاء الاصطناعي على الذكاء البشري ويبقى قادر على التطور بشكل مستقل وغير محدود.
ودي بعض اختراعات كورزويل اللي غيرت العالم وساهمت في تقدم العلم والتكنولوجيا. و كورزويل بصراحة هو رائد في مجاله ومصدر إلهام للكثير من المخترعين والمفكرين. عايزك تقولي في التعليقات تحت ايه رأيك في اخترعاته دي؟
المهم نرجع لموضوعنا ازاي بقى عم كوريزويل ده هيصنع الخلود البشري ؟
الاجابه هي بتقنية nanites اللي اخترعها ..
و تقنية nanites دي هي تقنية بتستخدم الروبوتات الدقيقة جداً (nanobots) للتفاعل مع الخلايا الحية والمواد الكيميائية في الجسم.
والتقنية دي ببساطة جدا هي اختراع روبوت متناهي الصغر نقدر نضخّه في الشرايين لإصلاح أي عطل في الجسم.
يعني هيبقى الروبوت صغير لدرجة اننا مش هنقدر نشوفه بعينا، وفي حجم كره الدم الواحدة، وهيتم ضخّه في الشرايين لإصلاح أي عطل في الجسم، وضبط أي خلل هنا أو هناك. و الـ «نانو – روبوت» ده هيتم توجيهه بواسطة الكمبيوتر وهيسبح بأعداد هائلة جدا في الشرايين والأوردة على اختلاف أحجامها وأشكالها أو مواضعها، لإصلاح جميع أنواع المشكلات الصحية في العضلات أو العظام أو الشرايين.. وبيقول، رايموند، ان الريبوت ده هيبقى قادر انه يصلح أي خلل في الجسم من الرأس لحد صوابع الرجلين مروراً بالشعر والأظافر.
وبيقول انه في المستقبل القريب هنقدر نزود طاقة الكومبيوترات مليار ضعف طاقتها في الوقت الحالي وهنصغر جسمها مائة مرة عن اجسامها في الوقت الراهن وخلال 8 سنين هنقوم بتصميم أجهزة كومبيوتر بحجم كرة الدم وتبقي قادرة على الدخول إلى داخل أجسامنا للمحافظة على صحتنا ومش بس كده كمان ده احنا هنحطها في الدماغ وهنقدر نزود ذكاء الإنسان. يعني حاجة كده اشبه بفيلم اللمبي 8 جيجا، ولو شايفين ان الموضوع ده صعب، احب أقولك انه بالفعل العلم قادر دلوقتي انه يحط جهاز كومبيوتر بحجم “حبة الفستق او حبه السوداني داخل الدماغ والموضوع ده معمول فعلا دلوقتي وبيتم استخدامه في معالجة الأشخاص المصابين بمرض الباركينسون والكمبيوتر ده بيقوم بوظيفة الأعصاب اللي دمرها المرض .
قياسا على كده فهو بيتنبأ انه خلال 8 سنين او اقل هيتم تصنيع ال nanites وهيبقى في مقدورنا علاج أي انسان او أي مرض عن طريق الذكاء الاصطناعي، ومش كده وبس ده كمان خلال 8 سنين هنقدر نستخدم نانايتس في العديد من التطبيقات:
1- المجال الطبي: لأننا هنقددر نستخدمها زي ماقولنا في المواد العلاجية بين الخلايا والأنسجة والأعضاء.
2- التشخيص: نقدر برضو اننا نستخدام النانايتس للكشف عن الخلايا السرطانية والعدوى الفيروسية والبكتيرية بشكل أكثر دقة.
3- الطاقة: نقدر برضو اننا نستخدم النانايتس في تطوير الخلايا الشمسية وتحويل الطاقة الشمسية لطاقة كهربائية.
4- التصنيع: نقدر نستخدام النانايتس في تصنيع المواد بطرق أكثر دقة وفعالية، وده هيقلل طبعا من النفايات المنبعثه منها والتكاليف الخاصة بيها.
5- الحماية: نقدر نستخدم النانايتس في تصنيع مواد مقاومة للخدش والحرارة والتآكل، وتحسين خصائص المواد وصلابتها.
بشكل عام، بتعتبر النانايتس المفتاح في تحسين العديد من المجالات الحيوية والتكنولوجية في المستقبل، وزي ماقولنا كل ده هيحصل في غضون 8 سنين بس، يغني ممكن نعيش ونشوف ده بعيونا بيتحقق فعلا.
Outro:
ياترى هل تقدر تتخيل ازاي هيبقى شكل عالمنا إذا كنا نقدر اننا نتحكم في أجسامنا وعقولنا بمساعدة التقنيةدي؟
يعني ساعتها ممكن بسهولة جدا نقدر نزور الفضاء، أو اننا نتحول لحيوانات، أو نتواصل مع بعض عبر الأفكار والتخاطر ممن غير مانحتاج اننا نتكلم. وممكن كمان نقدر نتغلب على مشاكل الزراعه والجوع في العالم ونعيش بسعادة وسلامة، أو ممكن الموضوع يتحول لكابوس ونواجه مشاكل جديدة عمرنا ما تخيلنا اننا هنعيشها او نشوفها في حياتنا قبل كده ، هو من الواضح اننا هنشوف قريب جدا تقنية مثيرة وممكن نتوصل للخلود بجد، بس المشكلة هنا هل هتبقى حياتتنا احسن او اسواء، ده اللي حابب اسمعه منكم دلوقتي في التعليقات.
وكمان حاطط لكم كتب العالم ده لو حابين تقرأوا اكثر عنه وعن مشاريعه، هتلاقو لينك الكتب موجود بطريقة مجانية كاملة على موقع مؤسسة هنداوي.
Call to action:
وفي النهاية، متنساش تسيب لايك على الفيديو لو عجبك، وتعمل سبسكرايب وتفعل زرار الجرس عشان يوصلك كل المحتوى اللي جاي، وميفوتكش أي جديد..
وأشوفك في الحلقة الجاية..
***
مصادر:
